Jude

Uru ngai etikirighi Jiud ghe pitiela

1 Aghi Jiud, kapuna tau ngai uungu ieghi Iesu Karisto, me nengane ieghi Jeimis

apitipiti ta am lo atoa God ghe koloamla, me God Tamaita ia eailousieiniem me eaitarainiem mausi Iesu Karisto.

2 Alooloo sae va God aue arangiseiem tale oroieili alousiusiaane, luei, me niailousi eteva.

Niaisakei tale kamena atoa tau ngai apasunga

3 Masi kapughu etoa, aghe annaailila va aghe pitipiti aatu etaimim tani aulia uungua nisaanga God eghelei etaita, ta aghe ateateaala va apitipiti me aghaulia ngakorokorongana etaimim tani ppooa kotokoto tale voto koronna God ghe taula katengaata ta kapuna atoa manga ila. 4 Poli katoa ase taumattu ngila ghe kupi einao ssola elome etaimim, emua arau laghe pitila va aue sesa voto elutu etaira. Karika la oneonea God. La aikolikolia maamasinaane kapuita God ateva elaolao tale aloannaaira sesaaili, me la ratirati Iesu Karisto, ie nonga kapuita namuu ia me Vauita ia.

5 Ngam ghe kilala kiukiu, me aghanna tani mene aulia etaimim va Vau ngepona ateva ghe ghaa oghila kapuna taumattu ngatoa eIjip, me emulina ghe tturuula lo atoa karika la aiesoa etana. 6 Ngam ghe kila teela ensolo atoa karika laghe ghelei emasinala uunguaaira nongina laghe tokatoka me laghe kasu vuli tanganueira, God ghe irilala tale sene atoa karika la rooroo tani tapate me la toitoi tale saurrom ateva tani aisakei tale kinatama nau niaisakei eteae. 7 Tale isaa nonga o ase salana, eSodom me eGomorra me llo masaliki taatara kalakala etairarua laghe ghaala sesa aipolipoli ta laghe tau vella vilikiira tani ghelei sesa niailai me laghe laula salana ghulughuluena tale uungua nilai. Liuna avalua o me la aimatoonga va am akekkeliem tale kura ateae karika erooroo tani pala.

8 Tale isaa o nonga ase salana, isaa o taumattu ila elome etaimim, tau niasoasopoi ila, la gheelei ekulukulutana vilikiira tale uungua niailai sesa, me la ratirati voto matuutuliena, me la aulia saasakia tee kapuna ensolo atoa God mallanga ila. 9 Me kapuira namu ngateva ensolo atoa ta Maekol karika ghe aimuli tee isaa o salana. Nau ghe aisakeana tee Satana, va see kaiaa Moses, karika ghe aulia saasakiaala ta God tani ghelei niaisakei ta Satana, ta ghe nim uela etana va, “Aue Vau ngepona ateva eghelei niasakei etam tale voto sesa ugheelei.” 10 Me ila o taumattu ngatoa la poppooa voto karika masina tee llo voto aloira karika emaamasaanga, me llo la ghalomasaanga tani ghelei la gheelei nonginaaili ghaata kkena atoa karika righi nannaaira, me isaa o voto etani tuuturungila.

11 Alousiusi etaira, ta ngila aimuli tee salane Kein, me la ghe ailuilui nonginaaili sesa gheleiaane Baelam laghe gheelei tani ghaa viliki veu. Aue la turungila nongina laghe turungila Kora poli ghe aamakatakata.

12 Isaa o taumattu nongina atu eteva etokatoka rungaa sao atikirighi tale uneimim niaighui me kinatama ninamanama atoa. La namanama teeiem me karikaaili emoimoila. Tau ngai toi sipsipi ila la angiinginila nonga; ila uru kookoo ila karika la ghalakuti vao me enim kuukuueinila see. Me ila arova ai eteae nauna tani kune me karika ekunekunea uene ta matena ia me la mene mukemukeia. 13 Paapalataaira tale gheeleiaaira eotuotu arova viiso koto ngelo malionge atoa la ghaasuu, me ila nongina katto atoa la nim ilou ekapa see, me saurrom ateva avoonaaili ia God ghe aimonomonosieiniela etaira tokatoka liu ia.

14 Inok, aiaaghaituna ia ta Adam, ghe ppooa ngamuemua alokoila inangari tale isaa oia ase taumattu, ghe uela va, “Tarala, Vau ngepona ateva ange maemae tee airari me airari kapuna ensolo atoa manga ila 15 tani ghelei niaisakei ta taumattu ngakapa atoa me tani apasunga sesa gheeleiaaira lo akapa atoa taumattu karika la oneonea God, me tale isaa akapaaili sesa voto laghe gheleila tale sesa salana, me tale sesa inangariira ila o tau ssavoto atoa laghe aulia teeiela.” 16 Ila o taumattu ngatoa tau niauliuliaa ila me la sessa tee mene katoa. La aimuli tee sesa aloaloanaaira me la tautau sae nannaaira me la ghaarua mene katoa tani nim asaesae arariira.

Nikolokolo tani poso parasi

17 Me masi kapughu etoa, am nnaa saa ateva kapuna apostolo atoa Vauita ateva Iesu Karisto laghe aulia ngamuemua alokoiela. 18 Laghe uela etaimim va, “Aue airuuruu tale nau, lo atoa la aanamisaa God aue la aimuli tee aloanaaira karika masina.” 19 Isaa o taumattu aue eatoka apolapolaiem, la aimuli tee nannaaira, me Spiriti eteva karika ia etaira.

20 Me am, masi kapughu etoa, am asarasarakanaiem tale uneimim niaikaaia mangaaili, me am looloo sae tee Spirit Manga ateva me esausiem. 21 Me am toka tale aielousiaane ateva God nau am toitoi Vauita ateva Iesu Karisto tani tau aatu maulue ateva tokatoka liu ia, poli ghe apasungala alousiusiaane etaimim.

22 Am aisausiaa lo atoa nannaira eghaaghalua. 23 Am asaangi lo atoa la ghanna tani saanga nongina va am ghe asaangilala tale kura ateae. Am apasunga alousiusiaaimim ta mene katoa tee nimoia, am akekkeliem tale kaluira ssavoto, egheeleila la kulukulutana.

24 God sarasarakana ia me eroo tani sausiem me karika am rooroo tani katuu. Erooroo tani ghaaiem me elaoainam tale voto ateva mallangina ateva etokatoka etana, nau etaraiem, karika aue etara righi sesa gheeleiaaimim. Me aue eroo tani tau aatu kinatama nimasimasi etaimim. 25 Ia nongaaili kapuita Goto ia, tau ngai asaangita ia, ta ngetana mallanga, namuu ia tale voto akapaaili, sarasarakana, me matuutuliena tale uunguaane Iesu Karisto, kapuita Vau palepale ateva, tale isaa akapa nau emua arau, ghaine me nau ngemuli. Koronna.